Hahahahaha 陳年舊💩
【家園在香港】歷代「檸檬茶女」，你最LIKE邊個？
我知呢個題目應該已經唔少人寫過，不過既然阿史已經認咗OUT，承認早兩日先知呢個牌子檸檬茶出咗復刻版，史友就包容吓我，畀我寫啦！不過我係唔會全部寫晒，只會寫幾個我喜歡的......
睇資料，呢個牌子檸檬茶第一代廣告應該係喺1986年播出，女主角就係後生啲嘅史友都唔會識、曾經做過大台劇集女一嘅梁佩玲。梁佩玲早已經退出娛樂圈，亦改咗名做梁藝齡，有興趣大家可以上網睇睇，大把料呀。
第二個阿史想講嘅係1989年嘅檸檬茶女樊亦敏，AMY姐近年復出拍劇，舊事亦都冇乜得好講。喺呢度，阿史想講個秘密畀大家知，當年樊亦敏選港姐拎到最上鏡小姐，阿史仲讀緊小學，雖然年紀輕輕，但已經為之著迷，於是把心一橫寫信畀AMY....結果真係收到回信，仲有親筆簽名相呀！！！大家唔使問喇，張相已經遺失咗，SO SAD。
第三個阿史想講嘅係1993年廣告女主角賴沅貞。或者因為當時年紀細，阿史當年真係覺得佢唔靚，但大個咗睇返，又愈睇愈有味道喎，報道話佢係富家女，而家亦已移民外國，祝佢幸福啦！
最後一個想講嘅檸檬茶女，絕對唔係張栢芝！做咩喎，一定要講架咩。阿史始終都係想講何嘉莉，大家或許已經唔記得，佢係1996年版嘅女主角呀！廣告內容好簡單，係你同索爆舊同學突然重遇，佢仲突然俾個電話號碼你，叫你記得打俾佢，好開心呀！
至於點解唔講張栢芝，可能因為太紅，阿史真係冇乜興趣講佢。講咗咁耐，到底大家最喜歡邊個？同阿史分享分享啦。
圖片：互聯網短片截圖
#家園在香港
Search